Telefɔni yaalata ye kumaɲɔgɔnyakɛlan ye, nka, dɔnkililamɛnnan fana don


untitled
Telefɔni yaalata ye kumagɔgɔnya nɔgɔya adamadenw ni ɲɔgɔn cɛ, nka a bɛ kunnafoni ni dɔnkiliko mago fana ɲɛnabɔ.
Arajo fitinin minnu n’an tun b’olu ye mɔgɔw bolo tuma bɛɛ ka kunnafoniw sɔrɔ ani k’u yɛrɛ dɔnkiliko magɔ ɲɛnabɔ, olu bɛ ɲini ka dɔgɔya k’a sababu kɛ telefɔni yaalata ye. An bɛ mɔgɔ caman ye, o bɛ kunnafoniw ni dɔnkiliw lamɛn u ka telefɔniw na.
untitled
O de kama, Arouna, n’o ye arajo, kasɛti, ɲɛnawɛrɛ ani mɔnturu feerela ye, o y’a jira k’a fɔ ko telefɔni yaalata y’u ka feerefɛn dɔw sanni sumaya. A ko:

A bɛ waatijan bɔ, n bɛ arajow, kasɛtiw, ɲɛnawɛrɛw ani mɔnturuw feere, wa a tun bɛ san kosɛbɛ. Nka, kabini telefɔni yaalata cayara, u sanni sumayara. An bɛ waatijan kɛ n’u ye sisan ka tɛmɛ kɔrɔlen kan, ka sɔrɔ u ma san. Lɛrɛ ni mɔgɔ lakununan min bɛ telefɔni na, o b’a to mɔgɔw magoba tɛ jɔ bolola mɔnturu ni sokɔnɔ mɔnturubaw sanni na kosɛbɛ.

untitled
Tuma dɔw la, baro bɛ to ka tigɛ tigɛ ni sannikɛlaw nana, nka, n barokɛɲɔgɔn, a nisɔndiyalen ka sira sɔrɔ k’a hakilinaw fɔ nin ko in kan, a tilala k’a ɲɛsin n ma ko :

I y’a ye ? Alisa sannikɛla dɔw bɛ na nin feerefɛn ninnu ɲininkali kɛ, nka u man can. I ɲɛ bɛ kasɛti minnu na, olu y’an ka feerefɛn belebele dɔw ye, nka u sanni dɔgɔyara fana k’a sababu kɛ telefɔni yaalata ye, janko dɔnkilimara kariti bɛ telefɔni minnu na. Mɔgɔw b’u sagola dɔnkili bɛɛ sɔrɔ kariti ninnu n’u ka telefɔniw kan. U bɛ dɔnkiliw ci ɲɔgɔn ma telefɔni dɔnkiliciyɔrɔ fɛ, a widolama yɛrɛ waati dɔw la. Bi bi in na, mayito dɔw bɛ yen ani mikoro dɔw, minnu bɛ se ka dɔnkilida telefɔni dɔkilimara kariti fɛ. O bɛɛ de kama, mɔgɔw magoba tɛ jɔ kasɛtiw la kosɛbɛ an bolo tugun fɔ n’a bɔra mɔgɔ damadɔw la a kadi minnu ye ten. Maakɔrɔbaw, faamaw, ani setigiw, olu de bɛ na u ɲini. Seba tɛ minnu ye, mɔgɔ dɔw, a kadi minnu ye ten, olu b’u ka arajomagow, lɛrɛkomagow ani dɔnkilikomagow ɲɛnabɔ n’u ka telefɔni yalata ye.

untitled
Aruna k’o kumafɔlen ninnu sɛmɛntiyara Ibarahima fɛ, n’o fana ye telefɔni feerela ye o yɔrɔ la yen. A ko :

Kana siga Aruna ka nin fɔlen ninnu na fiyɛwu. Nɛgɛso, moto ani mɔbiliw nana sennataama ni falikantaama nɔnabila an bolo cogo min na, nin minɛn ninnu fana bɛ ka ɲɔgɔn nɔnabila ten dɔɔni dɔɔni. N’i ye telefɔni lajɛ, arajo, lɛrɛ, lakunan, ani dɔnkili bɛɛ b’a la. O de y’a to a ye nin feerefɛn ninnu sanni sumaya i n’a fɔ a bɔra k’a fɔ cogo min na

untitled
I n’a fɔ walasa k’a ka patɔrɔn ka fɔlen tiɲɛtigiya, kamalenni dɔ, san 12 ɲɔgɔn, o ye mansinin dɔ jira n na, a sɛbɛnnen bɛ min kan: “mobile speaker” “kumala yaalata”. Kamalenni bɛ k’a ɲɛfɔ n ye. A ko:

I bɛ dɔrɔmɛ tan tan pili fila don a la dɔrɔn, k’i ka kariti don a la, ka tile ban ka dɔnkili lamɛn ka sɔrɔ I ma mɔgɔsi tɔɔrɔ.

O yɔrɔ de la, Jakarija y’i da don baro la, ka kumaw tiɲɛtigiya, ka sɔrɔ a bɛ ka wajuli lamɛn a ka telefɔni na.

Kumaɲɔgɔnya, kunnafoniw ani dɔnkilikko magow, ne b’o bɛɛ ɲɛ ni n ka telefɔni ye. A tali ka nɔgɔ n bolo, wa n dan ye k’a mara mananin dɔ kɔnɔ ni san bɛ na janko ni n bɛ kungo kɔnɔ.

Advertisements

Laisser un commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l'aide de votre compte WordPress.com. Déconnexion / Changer )

Image Twitter

Vous commentez à l'aide de votre compte Twitter. Déconnexion / Changer )

Photo Facebook

Vous commentez à l'aide de votre compte Facebook. Déconnexion / Changer )

Photo Google+

Vous commentez à l'aide de votre compte Google+. Déconnexion / Changer )

Connexion à %s