Nin ye hakilina dɔw ye Balikukalan tɔgɔladon seli kuncɛdon kan Mali la


untitledI n’a fɔ a fɔra kunnafini caman kɔnɔ ka tɛmɛn cogo min na, sɛtanburukalo tile segin tun ye balikukalan tɔgɔladon ye Diɲɛ kɔnɔ. O seli kurunbokarila Yelimane, Kayi mara la sɛtanburukalo tile san2010, Karamɔgɔ Saliku Sanɔgɔ fɛ, n’o ye Kalanko, Balikukalan ni Fasokanw Minisiri ye.
Ko tɔw bɛɛ kuncɛra arabadon, sɛtanburukalo tile 8 santiridekɔnferansi la Bamakɔ.
untitledO don kama, Balikukalan tɔgɔladon seli labɛnjɛkulu ye bakuruba kunnafonigafe labɛn walasa ka jama bɛɛ kunnafoni balikkalanko kan k’a ta kabini Mali ka yɛrɛta daminɛ na ka n’a bila bi la.
untitledKunnafoni in ja bɔra cɛakɛbaranin na karamɔgɔ Musa Jabi fɛ, k’a kalan jama ye. Kunnafoni tun b’a ta balikalan jujɔn na Mali kɔnɔ, a ye kɔbaw ni baba minnu tigɛ, cɛsiri ni sɛgɛn minnu kɛr’a ko la, a ye jɔda min ɲɛ togodalamɔgɔw ye ka tɛmɛn, a bɛ dabolo min na bi k’a sababu kɛ Mali fangaɲɛmɔgɔw, kalan minisirisow, kankoɲɛɲini baaradaw, kalanko dɛmɛbaw ani kɛnyɛrɛyew fɛ bi.
Karamɔgɔ Musa Jabi ye kunnafoni di in kuncɛ ni nin somɔgɔsama kumasen damadɔw ye :

« Kan man bon ni kan ye, kan man di ni kan ye, kan man fisa ni kan ye. Ni min y’a mago don a ta la, o ta bɛɛ taa ɲɛ. Min mana ban a ta la, kunmayɛlɛmabanfula bɛ don o tigimasina kun na.
Kalanbaliya dibi dakun wɛrɛ bɔra, n’o ye cakɛbaranin dɔbaliya ye »

Nin kumasen damadɔn ninnu faamuni, k’u kɔrɔ dɔn, o nafa bonya, a ka kan da ka ‘a ma k’a walawala dɔɔni.
« kan man bon ni kan ye, kan man di ni kan ye, kan man fisa ni kan ye »
O ye N hakili la, o ye tiɲɛ yɛrɛ ye bawo :
Ni kan tɛ, kuma ɲɔgɔnya tɛ yen, o min b’a to mɔgɔw bɛ ɲɔgɔn kɔnɔkow dɔn ka kow nɔgɔya ;

Ni kan tɛ, ɲɔgɔnfaamu bɛ gɛlɛya, wa faamubaliya bɛna ni bɛnbaliya ye sigiɲɔgɔnw ni ɲɔgɔn cɛ, baarada mɔgɔw ni ɲɔgɔn cɛ, jamanaw ni ɲɔgɔn cɛ ;
Ni kan tɛ, dɔnni tɛ sɔrɔ, kunfinya tɛ kɛlɛ, wa ɲɛtaa tɛ sabati ;
Ni kan tɛ, kɔrɔlenw bɛ tunun, diɲɛ na kɛ taabolontan ye bawo bi bɛ dila kunun kan, wa sini bɛ dila bi kan,
Ni kan tɛ, kunnafoni tɛ sɔrɔ, diɲɛ na to kunba la, mɔgɔw tɛ bɔ ɲɔgɔn ka kɛta kalama janko ka ɲɔgɔn ladege walasa diɲɛ sentan jamanaw ka setigi jamanaw nɔbɔ, ka taasira jɔnjɔn don demisɛnw kɔrɔ;
Ni kan tɛ, jɛɲɔgɔnya tɛ sabati sigidaw ni ɲɔgɔn cɛ ani jamanaw ni ɲɔgɔn cɛ

.

Ni sɔsɔli ma sɔrɔ nin halilina fɔlen ninnu na k’a fɔ ko kan bɛɛ fɔbagaw mago bɛɛ nin bɛɛ la u ka kanw kɔnɔ, ko kan kelen mɛbali fila tɛ se ka jɛ fiyɛw ni kanbayɛlɛmalikɛla t’u cɛma, ko mago bɛ kan kelen kelen bɛɛ la diɲɛ ka ɲɛtaa kama, ko ni kan dɔ tununna o ye diɲɛ dɔnko n’a seko dɔ tununnen ye, o b’a jira ko sɔsɔli t’a la k’a fɔ ko kan man bon kan ye, ko kan man di kan ye, ko kan man fisa ni kan ye.

« Min mana ban a ta la, kunmayɛlɛmabanfula bɛ don o tigimasina kun na. »

Kan wɛrɛ mɛni tɛ mɔgɔ kɛ o kan tigiw ye! I mana kan wɛrɛ mɛn cogo o cogo, i to tɔ don i ka jamana tɔgɔ la, i bɛ filɛ n’o seko, o dɔnko, o danbew, a n’o kɔrɔlenkow de ye. Wa fɔ an k’a dɔn ko kan wɛrɛ tɛ se abada, ka kan wɛrɛ nɔnabila diɲɛ forobakɛnɛw kan,n’e bann’i ka kan na, o kɔrɔ ye ko e tɛ forobakɛnɛ kan, ali n’i bɛ yen bawo kan t’i bolo.
N’o ye tiɲɛ ye, o b’a jira ko siga t’a la k’a fɔ ko ni mɔgɔ min banna a ka kan na, o bɛ to walikan wɛrɛ fɔbaw ladegeli la u ka kow la bawo, kan de bɛ Adamaden taabolo jira i la.
O si t’a la juguman ye fɔ yɛrɛkan mɛnbaliya kɛlen ka faamubaliya cooko i n’i faso denw cɛ, i faso kɔnɔ.

« Kalanbaliya dibi dakun wɛrɛ bɔra, n’o ye cakɛbaranin dɔbaliya ye »

Diɲɛ ye kurun de ye ji kan. A bɛ bɔ a nɔ na don o don. N’e mɔgɔ min banna ka don o kurun kɔnɔ, diɲɛ bɛ taa kiI to, wa i tɛ kun tɔw la bile abada. O dɔ ye cakɛbaraninko ye. Cakɛbaaranni ye kɛnɛ minɛ diɲɛko bɛɛ la bi. Mɔgɔ o mɔgɔ, k’i y’i ka kan kalan k’a dɔn, k’a dɔnnakari, n’i tɛ ka baara kɛ n’a ye cakɛbaranin na, i n’a to dibi la bawo diɲɛ mɔgɔ tɔ tɛna i kan mɛn, k’i ka kɛtaw ye. I ka baara na kɛ sanjikɔrɔwɔsi ye, k’a mara i yɛrɛ kɔrɔ bawo a tɛna dibi kogo kari, ka cogoyɔrɔ sɔrɔ diɲɛ dɔnnibulonba kɔnɔ, n’o ye ɛntɛrinɛti ye, o min kɛra dɔnkow jɛrɛyɔrɔ ye.

Wa, foyi tɛna an ka kan taa ɲɛ ka se yen fɔ an yɛrɛ ka cɛsiri ni baara. O de kama, ne y’a kɔlɔsi nin kuma in fɔ don, ko n ye baara min kɛ, n’o ye ka se ka kunnafonidiyɔrɔ dila bamanankan na ɛntɛrinɛti kan walasa ka dibi fara ka bɔ bamanankan ni diɲɛ kan tɔ cɛ, jɔyɔrɔ na ye o la don dɔ. Ne na n seko kɛ n faso kunnafonidili la n fakan na diɲɛ kunnafoni kafobulonba kɔnɔ.

Ne y’a dɔn ko jɔyɔrɔ bɛ n ka kan na ɛntɛrinɛti kan togodalamɔgɔw kama, don min na n sera ka farafinyasabatilikɛlɛ cɛba dɔ niyɔrɔ taasibila dɔ bayɛlɛma bamanankan na, n balemaw ye min ɲɛnajɛ kɛra Faransi ka ɲɛsin Ɛme Sɛzɛri ma. Farafinna mɛɛna ni jɔnya zu ye a kan na, a mɛɛna ni jɔnyajuru ye a sen na. Cɛba dɔw de ye u seko kɛ walasa ka Farafin ka hɔrɔnya n’a danbe d’a ma. Yali a man kan an ka togodalamɔgɔw ka bɔ o kalama wa ? Kɛcogo wɛrɛ jumɛn b’o la, n’a ma fɔ an ka kanw na?

Ne y’a dɔn ko jɔda bɛ an ka kanw na nin kuma in fɔyɔrɔ la, waati min na ne miiri jiginna a la ko a mɛɛna, kunnafoni di kɛ bana dɔ kan, bana min tun ye diɲɛ kolo gan waati la, n’o ye giripu pɔrisini ye min daminɛna Mɛkisiki. O b’a jira ko Ɛntɛrinɛti kan, an ka kanw bɛ se ka kɛ sababu ye k’an ka togodalamɔgɔw tanga diɲɛ kojugubaw ma ani k’u kunnafoni yɛrɛtanga cogoya caman na.

Ne nisɔndiyara waati min na, Minisiri ka dantigɛli la, ne y’a ye ko ne tun ka sɛbɛnni sera o yɔrɔ dɔw ma ka ban:

« N’an bɛ taama an ka jamana kɔnɔ, an ka duguw tɔgɔw sɛbɛnnen ye an ka kan na, an ka se k’u kalan. »

Dusu kura donna ne na ne kɛlen ka Balikukalan nafa mɛn musow ka ɲɛtaako la nin don, ka sɔrɔ ne tun ye nin kunnafoni in sɛbɛn ka ban Balikukalan nafa kan an ka togoda musow ka ɲɛtaa la.

Ne hakili jiginna nin sɛnɛkɛla in na, o min wasalen don n’a ka kan ye, bawo a y’a ka diɲɛlatigɛ mago caman nɔgɔya a bolo.

Ne y’a dɔn ko tiɲɛ yɛrɛ la, an ka kanw ye nɔ bɔ, waati min na ne sera ka san 2010 Diɲɛ ntolatanba carinni na ɛntɛriniɛti kan bamanankan na ntolatan kɛ waati yɛrɛ la ekipuw ni ɲɔgɔn cɛ ntolatankɛnɛ kan.

Tiɲɛ yɛrɛ la, Farafinnakanw ye nɔ bɔ! Dɔ ka kan ka fara cɛsiri kan, walasa gɛlɛya o gɛlɛya bɛ an ka kanw kan ɛntɛrinɛtiko la, fura ka sɔrɔ o gɛlɛyaw bɛɛ la.

Advertisements

Laisser un commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l'aide de votre compte WordPress.com. Déconnexion / Changer )

Image Twitter

Vous commentez à l'aide de votre compte Twitter. Déconnexion / Changer )

Photo Facebook

Vous commentez à l'aide de votre compte Facebook. Déconnexion / Changer )

Photo Google+

Vous commentez à l'aide de votre compte Google+. Déconnexion / Changer )

Connexion à %s