Kalan, Balikukalan ani Fasokanw Minisiri ka laseli lakɔlita hukumu kɔnɔ


untitledMinisiri Saliku Sanɔgɔ ka laseli kɔfɛ san 2010 lakɔlita hukumu kɔnɔ taratadon ɔkutɔburukalo tile 12 nazarakan na jamana kunnafonidilaw tɔgɔlasoba kɔnɔ, a ye laseli kɛ kunun, ɔkutɔburukalo tile 20 san 2010 bamanankan na. Laseli in kɛra an ka kanko ɲɛɲini cakɛda ɲɔgɔnyesoba kɔnɔ, min tɔgɔ dalen bɛ Abulayi Bari la. Mɔgɔ caman tun bɛ kɛnɛ in kan.
Jamana foroba arajoso, kɛnyɛrɛye arajosow kunnafonidila minnu bɛ laseliw kɛ an ka kanw na, minnu bɛ kunnafoniw sɛbɛn an ka kanw na, olu tun bɛ kɛnɛ kan. Kalan Minisiriso ɲɛmɔgɔ caman tun bɛ kɛnɛ kan.

Minisiri kɛlen kɔ ka foli ni waleɲumandɔn kɛ ka ɲɛsin a ka baarada mɔgɔw, Lakɔliko ɲɛmɔgɔsow marabolow kɔno, Lakɔlikaramɔgɔw, lakɔlidenw, lakɔlidensomɔgɔw, Kalankodɛmɛbagaw ani jamanadenw bɛɛ ma, a ye dugawudon kɛ, k’a jira k’a fɔ ko Ala ye San tɛmɛnnen kalanko laban hɛrɛ la, Ala ka ɲinanta fana tɛmɛn hɛrɛ la. O foli ni waleɲumandɔn kɔfɛ, Minisiri ye dantigɛli kɛ ka ɲɛsin kalanko ma. O dantigɛliw tun bɛ boli fɛn caman kan kalanko la, k’a ta san tɛmɛnnen walekɛlenw na, ɲinan baaraw boloda cogow, fɔ ka se dabali tigɛlenw ma san nataw la.
San tɛmɛnnen wale kɛlenw na, Minisiri y’a jira k’a fɔ ko kalansojɔ sankɔrɔtara kosɛbɛ. Kalanko dɛmɛbaga cayara, o kɛra sababu ye ka kalanso caman jɔ denmisɛnw ye. Jamanakuntigi ye miliyari 5 ani miliyɔn kɛmɛ 4 bila kalan minisiriso ka bolo kan, walasa ka lise 5 jɔ (Kangaba, Bila, Bankasi, ɲɔnɔ ani Direyi), ani fɛɛrɛkalanlise 2 (Sikaso ni Mɔti/Seware), ani baaradegekalansoba, ka ɲɛsin izinibaarakow ma. Nafolo bɔlen tara FASO TELEFƆNISO feerelen wari la. A ko Kayi Baaradegekalansoba lafɛrɛla : kalanso wɛrɛw jɔra a kɛnɛ kan ka ɲɛsin izinikobaaraw ma, ɲamakɔrɔ ni Welesebugu lisew jɔli bɛ senna ni Diɲɛ Waribonba ka dɛmɛ ye. Marabolow Asanbilew fana ye lisew jɔ, i n’a fɔ Kayi mara Asanbile ye min jɔ Yelimaane, ani Segu mara Asanbile ye fɛɛrɛkalanlise min jɔ Segu ani baaradegekalansoba, Bila dugu kɔnɔ. Lukusanburu jamana fana ye dɛmɛ kɛ ka Bamakɔ lise tɛkɛniki labɛn, k’a kuraya…
Minisiri y’a jira k’a fɔ ko nin kalansojɔ in kun ye walasa an ka jamana denmisɛn caman bɛ se ka taa lakɔli la cogo min na. A ko ni kalansow cayara, denmisɛn caman bɛ se ka taa lakɔli la, ni cɛmancɛ kalansow caraya marabolow kɔnɔ, denmisɛnw na se ka to u bangebaw kɔrɔ ka kalan kɛ, o na dɔ bɔ denmisɛnw ka jatigiyako gɛlɛya la kalanko sira fɛ. Minisiri ka laseli la, a y’a jira ko jamanadenw y’a ɲini u ka hakilijagabɔba senfɛ (ɔkutɔburu tile 30 ka na se nowanburu tile 2 ma, san 2008), min tɔgɔdara ko « Forum », ko kalan ka wolo se damadɔ la : den ka kalan cogo la min b’a to n’a bɔra lakɔli la, a ka se k’a yɛrɛ ɲɛnabɔ sɔrɔ ni hadamadenya siratigɛ la ; fɛɛrɛkalan ka caya kalanso 9 nan dɔnniseereyasɛbɛn sɔrɔlen kɔfɛ. Denbatigiw, lakɔlikaramɔgɔw, kalanɲɛmaaw, maakɔrɔw bɛɛ y’a ɲini dɔ ka bɔ bakurubakalan na, ka kalan kɛrɛnkɛrɛnnenya, a ka wolo sew la, minnu bɛ den kɛ maa ye. O laɲini kelen ninnu de bɛ Baki fana kɔ, n’o ye kalanso 12 nan sanlaban kiimɛliba ye ; a ka kɛ dipulɔmu ye, min bɛ a tigi nafa baarako taasira fɛ. Min ye kalan kun fɔlɔ fanfɛla ye, cɛsiri ɲɛnama kɛra ka kɛnɛyako ni baloko don da la ; farikoloɲɛnajɛ ni adamadenya ni jamanadenyakalan ye barika sɔrɔ bi-bi in na. Kalanso 9 nan sanlaban kiimɛli fana yɛlɛmana k’a kɔnɔkow labugun.
Min ye Karamɔgɔw ta ye, u tali bɛ senna bolo fila kan : fanga ka bolo ani marabolow ka bolo. Sɛtanburu tile 28 san 2010, karamɔgɔw tali dosiye min lasera jamana forobabaara minisiriso la, o bɛnna baa tan ni naani ani bi kɔnɔtɔn ani segin (14 098) ma. O ɲɔgɔnna bɛ ka baara walasa karamɔgɔ bɛɛ ka ta lafiya kɔnɔ.
N’o bɔra yen, ɲɔgɔndan dɔ bɛ ka labɛn ka karamɔgɔ baa naani, kɛmɛ saba ni bi duuru ani naani (4354) ta baara la, ɲinan san kuntagala kɔnɔ. Minisiri y’a jira k’a fɔ ko nin yɛlɛma ninnu ni nin hakilina ninnu bɛɛ kun ye walasa an ka jamana kalanko ka taa ɲɛ, laɲiniw ka sabati kalanko la, denmisɛn ka kalan, k’u labɛn cogo la min b’a to u na se k’u kɔgɔ da jamana wɛrɛw denmisɛnw kɔgɔ la dɔnni ni ɲinini sira fɛ. san nataw baara bolodalenw na, Minisiri da sera fɛn caman ma. A y’a jira k’a fɔ ko Barra caman bolo dalen bɛ ɲinan lakɔlita hukumu kɔnɔ : Lisew kɔnɔ kalanko taabolo bɛ yɛlɛma, ka barikaba don fɛɛrɛkalanw ni baaradegekalan na, kalanso kuraw bɛ jɔ san fila nataw kɔnɔ, kalan kɔlɔsiliko ɲuman baarada 22 bɛna sigi senkan ka fara kɔrɔlenw kan, Sɛrɛwusida kuraw sigili bɛ senna, Hakilijagabɔ bɛ senna ka ɲɛsin kiimɛliw ma, kalan kun fɔlɔ n’a filanan kuntagala kɔnɔ, dɔ bɛ fara kɛnyɛrɛye kalansow kɔlɔsili bonya kan ka taa a fɛ, walasa denmisɛnw ka kalan a ɲɛ ma.
Minisiri Saliku Sanɔgɔ y’a jira k’a fɔ ko ale n’a ka baarada sigi kun ye kalan taaɲɛ n’a yiriwali ye, wa u n’u seko bɛɛ kɛ walasa jamanaden bɛɛ ka nimisiwasa sɔrɔ kalanko la Mali kɔnɔ. A ko nka ale n’a baaraɲɔgɔnw dɔrɔn tɛ se, ko bɛɛ ka kan ka jɛ k’u bolodi ɲɔgɔn ma ka hakilina talen ninnu waleya. A ko kalandensomɔgɔw niyɔrɔ ka bon kosɛbɛ denw ladamuni n’u kɔlɔsili la. A y’a jira ko walasa kalan ka don ba la, fo bɛɛ ka jɛ ka lakɔli sariyasun bato : ɲɔgɔnbonya, bɔsiradɔn, kɛtaw dɔnni n’u batoli, baara, baarakɛla waleɲumandɔnni, sannasɔrɔ ni jɔyɔrɔfa.
Minisiri y’a jira fana ko kunnafonidilaw jɔyɔrɔ ka bon kosɛbɛ kalanko ani an ka kanw kalanni, u ka ɲɛtaa ani u yiriwali la. A ko kunnafoni min bɛ di kunnafolidilaw fɛ an ka kanw na, o bɛ kɛ sababu an ka jamanaden bɛɛ ka faamuyali caman sɔrɔ an ka jamanakɔnɔkow kan. O la, a ko kunnafonidilaw ani ale ka baarada ka kan kan k’u bolo di ɲɔgɔn ma, ka baara kɛ ɲɔgɔn fɛ walasa an ka kanw ka kɛ an nafanan ye.
Minisiri ye kuma kuncɛ ni foli ye, k’a jira k’a fɔ ko an bɛɛ y’an cɛsiri cogo min na ka salon kalanko kɛ nimisiwasa ye, n b’a ɲini bɛɛ fɛ, bɛɛ k’i cɛsiri o cogo kelen na ɲinan, walasa ka ɲinan ta fana kɛ nimisiwasa ani kunnawoloko ye.

Publicités

2 réflexions au sujet de « Kalan, Balikukalan ani Fasokanw Minisiri ka laseli lakɔlita hukumu kɔnɔ »

Laisser un commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l'aide de votre compte WordPress.com. Déconnexion / Changer )

Image Twitter

Vous commentez à l'aide de votre compte Twitter. Déconnexion / Changer )

Photo Facebook

Vous commentez à l'aide de votre compte Facebook. Déconnexion / Changer )

Photo Google+

Vous commentez à l'aide de votre compte Google+. Déconnexion / Changer )

Connexion à %s