An ka hadamadenya taabolo dɔw sen bɛ yurukuyuruku bonyali la


untitledYan, n kan tɛ yurukuyurukubaw ma n’o ye jamanaforobafɛnw ŋanamuni ye. N kan bɛ tɛgɛdonbolo caya ma minnu bɛ kɛ an ka foroba cakɛdaw la. Delilikɛlaw caya an ka forobacakɛdaw la, o bɛ se ka kɛ sababu ye ka ɲɛmɔgɔ caman tɛmɛn u seko kan walasa ka delilikɛlaw nimisiwasa. Waati bɛɛ folibila ɲɛmɔgɔw la walasa ka bɔ nin biye damadɔ kurulen y’i bolo kɔnɔ, o bɛ ka kɛ wale ye an ka cakɛdaw la min bɛ ɲini ka dan tɛmɛn, wa a sen bɛ yurukuyuruku misɛnninw cayali la an ka jamana kɔnɔ.

Forobacakɛla bɛ baara kɛ walasa ka kalo kun fila tugun ɲɔgɔna na. A bɛ se ka kɛ kalo dɔw bɛ yen yɛrɛ, a ka gɛlɛ a ka se k’a yɛrɛ ka du musakaw dakala, ale de b’o dɔn ! A bɛ delilikɛla fana ɲɛ na ko forobacakɛla in jufa falen don bawo a bɛ baara kɛ biro sumalen kɔnɔ, a kannafini ka ɲin waati bɛɛ, a bɛ moto ɲuman kan walima mobili ɲuman kɔnɔ waati bɛɛ. Ola, a ka nɔgɔ a bolo a ka se ka ale dɛmɛ wa n’a m’a kɛ fana, a banna de, n’o tɛ a se b’a ye. O de ye delilikɛla miiriya ye. Ola, an b’a fɔ ko a ka jugu, a ka sira tɛ hadamadenya la, an b’an fɛlɛ k’a kɔnɔ bawo a bɛ fɔ bamanankan na ko don bɛɛ man kan mɔgɔ ma. Don dɔ i ka jan, don dɔ i ka surun. O tɔgɔ tiɲɛw ɲɛsiranɲɛ kama, ɲɛmɔgɔ dɔw bɛ se ka dili kɛ fɔ ka tɛmɛ u ka sɔrɔ kan.

Fura sɔrɔ man di bana in na bawo a bɛ fɔ bamanankan na ko: “muruda ka go, sogo ka fasa”, ola a dun bɛ kɛ di?

Delilikɛla b’a sinsin an ka hadamadenya taabolow kan ka forobacakɛla bila ko la min se t’a ye. Forobacakɛla, siran kama tɔgɔtiɲɛ ni don nataw kuma ɲɛ bawo mɔgɔ tɛ sinin dɔn, o fana b’a wolo fara kuma dɔw la fɔ ka forobanafolo ta walasa ka delilikɛla nimisiwasa. O 100, 400, 500 min bɛ bɔ don o don birow kɔnɔ o ye jɔnni nɔ ye? Delilikɛla wa, dibaga wa walima hadamadenya taabolo?

Delilikɛla dɔ bɛ yen, taabolo wɛrɛ t’olu la fɔ ka yaala forobacakɛdaw ni ɲɔgɔn cɛ, k’u kunkow fɔ walasa ka wari sɔrɔ. Kuma wɛrɛ tɛ dɔw yɛrɛ da fɔ: “n y’a minɛ piɲa bawo forobawari don, an tɛ se k’a to u kelen k’a bɛɛ dun.”

ɲɛmɔgɔ dɔw bɛ yen, u kɛlen kɔ ka wari di delilikɛla ma, n’o bɔra, i b’u kan mɛn: “i y’a ye, a bɛ tan tuma bɛɛ. U ɲɛna ko an ka jufaw falen bɛ waati bɛɛ, wa ni an m’u sɔn, u bɛ taa an tɔgɔ tiɲɛ.” O sɔnni in nye sagola sɔnni ye wa, walima diyagoya sɔnni don?

N’a sɔrɔla sagolasɔnni don, dilibaga tɛ kuma nin cogo in na. wa ni diyagoya don, a na kɛ hadamadenya taabolo ka diyagoya ye bawo delikɛla b’a yɛrɛ ye dilibaga duguma waati bɛɛ.

O kɔlɔsili ninnu kɔfɛ, ne y’a miiri waati bɛɛ ko nin yurukuyuruku fitinin ninnu fana sen bɛ jamana wagande lankolonyali la dɔnni dɔnni.
N m’a fɔ ko delili kana kɛ, n m’a fɔ ko delilikɛlaw kana sɔn, bawo, delilikɛlaw dɔw bɛ yen, gɛlɛya yɛrɛ yɛrɛ b’olu kan tiɲɛ yɛrɛ la. Olu ni dɛmɛ ka kan. Nka, a ka kan ladili ka kɛ walasa ka dan sigi nin ko in na n’o tɛ a laban bɛ kɛ kunko ye faso ni ɲɛmɔgɔw ma.

Publicités

Une réflexion au sujet de « An ka hadamadenya taabolo dɔw sen bɛ yurukuyuruku bonyali la »

Laisser un commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l'aide de votre compte WordPress.com. Déconnexion / Changer )

Image Twitter

Vous commentez à l'aide de votre compte Twitter. Déconnexion / Changer )

Photo Facebook

Vous commentez à l'aide de votre compte Facebook. Déconnexion / Changer )

Photo Google+

Vous commentez à l'aide de votre compte Google+. Déconnexion / Changer )

Connexion à %s