Togodala denmisɛn minnu bɛ dugubaw, forow b’aw weele


DSCN0125

San o san, ni ɲɔtigɛw banna, an togoda la demisɛnw, kamalenw ni Npogotigiw bɛ taama minɛn ta, ka dugubaw magɛn ka taa fɛn ɲini ka segin faso la ni sɔmiɲɛ surunyana. Nin weele in bɛ bila mɔgɔw ma, minnu tɛ segin waati dɔn, ka segin so joona.

DSCN0123

Dugu demisɛnw, cɛ ni muso, seginso tuma wera. Sanji fɔlɔw binna. Bubagaw binna ka ɲɔkala kɔrɔw ɲimi ndugunw ni ɲɔgɔn cɛ. Baninkɔnɔw ye nali daminɛ kelen kelen k’u ɲagaw da jiribaw bolow la dugu kɔnɔ ani dugu kɔ kan. Baganw binna k’u dahirimɛ sɔrɔ dugu soforo kunna bin falennen fɔlɔw la, ka jiminta sɔrɔ kɔw kɔnɔ ka sɔrɔ u ma taa yɔrɔjan. Kungo kɔnɔna filɛ diyara k’a sababu kɛ bin falenna, jiriw nugura, fan bɛɛ kɛra ɲɛ binkɛnɛman ye. Dugukolo sɔmiɲɛ tuma suma duman bɔra. An balemakɛ minnu tora an kɔ faso kɔnɔ, olu tilala sow ni kogow munni na, ka foro sɛnɛtaw labɛnni daminɛ, ka furaw tigɛw, ka kalaw cɛ, ka nɔgɔ cɛ ka taa forow la.

DSCN0115

An ɲɔgɔnna caman sera so ka ban. Ɲininkali cayalen don an bagebaw fɛ walasa k’a dɔn n’an bɛ segin so walima n’an tɛ taa. An terikɛw, an balema musow, an kɔrɔmuso denw, ani an kanimɛw ka kɔɲɔw dɔgɔ dara ka ban. Alamisa kɔɲɔw bɛ ka caya ɲɔgɔn kɔ. Teri minnu famana ɲɔgɔn ma ka sababu kɛ taama ye, olu bɛ ka ɲɔgɔn sɔrɔ o kɔɲɔ yɔrɔ ninnu na, wa o ye duguba kɔnɔ barrow daminɛnen ye.

DSCN0103

Dutigiw ye dabaw ni falow sama ka bɔ jigiɲɛw kɔrɔ ka taa n’u ye numukɛ ka so ka taa u labɛn. Ɲɛnafin tɛ numukɛ la bilen. Minnu nana n’u ka minɛnw ye dilanni na a ka so, olu bɛ tile ban a ka so, k’u ka minɛn dilantaw kɔnɔ. A ka maritow mankan ni kolonkalanw mankan bɛ ɲagamin ɲɔgɔn na k’o kɛ fɔlifɛn duman makan ye min lamɛni ka di an na k’an to soforow la, bawo o b’a jira an na ko sɔnni an bɛna dumuni kɛ jiriba kɔnɔ foro cɛmancɛ la.

Nin bɛɛ lajɛlen faralen ɲɔgɔn kan, a tɔ ye min ye, an b’o dɔn : o de ye ka kɔ segin so, ka taa maakɔrɔw kɛrɛfɛ, faw nib aw, fanga t’olu minnu bolo la tugun ka daba sama forow kɔnɔ tile fariman kɔrɔ ka kɔngɔ kɛlɛ, kɔngɔ min ka baara tɛ dɔwɛrɛ ye ka duw ɲini, du minnu cɛbalenw ma segin so ka na u jɔyɔrɔ fa.

N balenma cɛbalenw ni npogotigiw, an ka segin so, an ka taa fakɔrɔw ni bakɔrɔw ɲɛ bɔ sira la. U kɔrɔtɔlen bɛ an seginni kɔrɔ.

 

Publicités

Laisser un commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l'aide de votre compte WordPress.com. Déconnexion / Changer )

Image Twitter

Vous commentez à l'aide de votre compte Twitter. Déconnexion / Changer )

Photo Facebook

Vous commentez à l'aide de votre compte Facebook. Déconnexion / Changer )

Photo Google+

Vous commentez à l'aide de votre compte Google+. Déconnexion / Changer )

Connexion à %s