Togodala lakɔlidenw ye u ka jamana lakodɔn k’a sababu kɛ Ɛntɛrinɛti yaalata ye

Lasana bɛ ka Wa Kamisɔkɔ ka tariku fɔ lakɔlidenw ye

Seko ni dɔnko ŋana caman de bɛ Mali kɔnɔ. Bɛɛ n’i dɔnko n’i seko don. Caman lakodɔnnen bɛ k’a sababu k’u ka tarikuw kalanni ye lakɔli la, walima k’a sababu k’u tanu ni n’u kofɔli ye jeliw fɛ, olu minnu y’an ka laadalakow tɔbɔtɔbagaw ye. Sisan demisɛnninw tɛ caman lakodɔn nin mɔgɔba ninnu ka ko la an ka jamana kɔnɔ.

@fasokan bɛ ka ja dɔw tariku fɔ lakɔlidenw ye

Ɛntɛrinɛti yaalata lakɔlisow kɔnɔ, bulɔgu bilali duguw kɔnɔ, sigidaw kunnafonidili Ɛntɛrinɛti kan, olu ye walew ye, minnu bɛ jamana yɛrɛ, a n’a seko n’a dɔnko dɔnni nɔgɔya jamana demisɛnw bolo. O de la, dugu 8 lakɔlidenw sera ka caman dɔn Wa kamisɔkɔ ka tariku kan, min sɛbɛnnen bɛ Wikipeja kan nin cogo in na : « Wa Kamisɔkɔ bɔra jeli kabilaba la, min tun ɲɛsinnen bɛ Kirina kɛlɛ ni Mali masabonda sigili ɲɛfɔli n’a matarafali ma. A ye dɔnnin ni faamuyali caman sɔrɔ Manden laadalakow n’a seko ni dɔnkow kan. » Wa Kamisɔkɔ ye laadalakow dɔnba jɔnjɔn ye, a lakodɔnnen bɛ kosɛbɛ an ka maakɔrɔbaw fɛ, nka, sisan demisɛnw tɛ fɛn dɔn a ka ko la. «Nin ye anw senɲɛ fɔlɔ ye k’a lakodɔn, k’a ka tariku lamɛn », lakɔlidenw y’o fɔ an ka yaala sen fɛ.

Ɛntɛrinɛti kɛra sababu ye, nin lakɔliden ninnu sera ka Wa Kamisɔkɔ kaburu ja ye, ka tila k’a ka tariku lamɛn a yɛrɛ denkɛ Lasana fɛ, min y’a fa ka koba kɛlenw ɲɛfɔ u ye.

« Nin Ɛntɛrinɛti kalan in an ka lakɔliw la, o kɛra sababu ɲuman ye anw ka lakɔlidenw ma u ka se k’u ka jamana dɔn ka sɔrɔ u ma bɔ u nɔ na. U bɔra sisan ka ja dɔw ye i n’a fɔ Madinɛ Fɔri Kayi (Mali seko ni dɔnko tɔbɔtɔbɔli baarada ɲɛmɔgɔso bulɔgu kan). U tun tɛ na o ye sisan k’a sababu kɛ u n’o cɛ ka jan kosɛbɛ », o kɛra lakɔlikaramɔgɔ dɔ ka faamuya ye Ɛntɛrinɛti kalan laban na.

UNESCO Porozɛ Niger-Loire ka seko ni dɔnko tɔbɔtɔli baaraw taali ɲɛ nin sira in kan, o ye dɛmɛba ye bawo a na kɛ sababu ye an ka seko ni dɔnko cɛba minnu bɛ an ka togodaw la, olu ka lakodɔn demisɛnw fɛ,  ni Ɛntɛrinɛtiko tara ba la an ka duguw kɔnɔ.

Publicités

Ɛntɛrinɛti lakodɔnni lakɔlidenw misɛnninw fɛ mangoro kɔrɔ, Sekɔrɔ

Lakɔliden misɛnninw bɛ Ɛntɛrinɛti kunna mangoro kɔrɔ

Sekɔrɔ ye dugu laban ye yanni i ka don Segu dugu kɔnɔ i bɔtɔla bamakɔ. Ɛntɛrinɛti kalan dɔ tun ɲɛsinnen bɛ  kalanso kɔnɔntɔnnan lakɔlidenw ma walasa k’u ka dɔnniɲini nɔgɔya u bolo i n’a fɔ n’u bɛ dɔnni bulonba kɔnɔ. Nka, lakɔliden misɛnninw fana tun bɛ fɛ ka Ɛntɛrinɛti sidɔn, k’a kunfa bɔ u la.

I n’a fɔ jaabi u ka kumakan na : « anw fana bɛ fɛ ka ɛntɛrinɛti kalan », nin kalan in sigira sen kan mangoro kɔrɔ demisɛnninw ye. A kɛra sababu ye demisɛnninw ka ɔridinatɛri mɛnɛ, ka Ɛntɛrinɛti kile don a la, ka taa «Google » kan, k’u ka ɲininiw kɛ kelen kelen.

Ɲinikali ka ɲɛsin ne ma Ɛntɛrinɛti yaalata kan togodaw la Mali la

Bukari @fasokan bɛ ka baara kɛ Ɛntɛrinɛti yaalata kan Mali dugu dɔ la.

Mɔgɔ bɛ se ka baara kɛ Ɛntɛrinɛti kan cogodi togodaw la ka sɔrɔ sibɛrikafe tɛ yen, kuran tɛ yen, Ɔridinatɛri tɛ yen ? Ɛntɛrinɛti yaalata y’o fura ɲumanba ye. O b’a to i bɛ se ka baara kɛ Ɛntɛrinɛti la fan bɛɛ togodaw la. Aw yen in ɲininkaliw ni jaabiw kalan Angilɛkan ni Tubabukan na walasa ka kunnafoni wɛrɛw sɔrɔ o ko kan.

Nin ye Akendewa ka weleweledakan ye : Bamanankan kalanni tako fɔlɔ

Aw ni sɔgɔma !

Akendewa nisɔndiyalen b’a jir’aw la ko a bɛna Bamanankan kalanni tako fɔlɔ bila sen kan Ɛntɛrinɛti sira fɛ.

Akendewa ko a b’a jira ko a haminanko dɔ ye Farafinnakanw ka ɲɛtaa ye. O la sa, a ko mɔgɔ o mɔgɔ, i kɛra Bamanankan fɔbaa kɔrɔ ye o, i ma kɛ Bamanankan fɔbaa ye, n’i bɛ fɛ Bamanankan kalan, k’a sɛbɛn, ka jate bɔ Bamanankan na, ka foli ni baro k’a la, i k’i sen don u ka nin bamanankankalan in na ɛntɛrinɛti sira fɛ.

O la, Bamanankan fɔbaw ani Farafinnakanw kanubaw, nin ye sababu ɲuman ye walasa aw bɛɛ ka se ka bamanankan kalan, kan min fɔlen bɛ kosɛbɛ an ka jamanaw kɔnɔ.

Nin Bamanankankalan tako fɔlɔ in bɛ kɛ waati 3 kɔnɔ. (mɛkalo tile 7, tile 14 ani a tile 21) ka bɔ nɛgɛ ɲɛ 10 ni miniti 30 la ka se nɛgɛ ɲɛ 12 ma.

Bamanankankalan in karamɔgɔ ye Bukari Konate ye n’o ye bulɔgutigi lakodɔnnenba ye ka bɔ Mali la k’a sababu kɛ a ka bulɔgu ye Bamanankan na.

Walasa k’aw sen don nin kalan in na, a ka kan aw k’aw tɔgɔ sɛbɛn. Aw ye don yan walasa k’aw tɔgɔ sɛbɛn.

Kalan in daminɛni layidu fɔlɔ dilen bɛ ka bɛn mɛkalo tile 7 ma nɛgɛ ɲɛ 10 ani miniti 30 waati. Aw ye na fara Akendewa kan, k’an ka kanw don ba la.

https://spreadsheets.google.com/spreadsheet/viewform?formkey=dEk2NlJ3QW00cmd1NGRTWHN0c0NxS1E