Togodala lakɔlidenw ye u ka jamana lakodɔn k’a sababu kɛ Ɛntɛrinɛti yaalata ye

Lasana bɛ ka Wa Kamisɔkɔ ka tariku fɔ lakɔlidenw ye

Seko ni dɔnko ŋana caman de bɛ Mali kɔnɔ. Bɛɛ n’i dɔnko n’i seko don. Caman lakodɔnnen bɛ k’a sababu k’u ka tarikuw kalanni ye lakɔli la, walima k’a sababu k’u tanu ni n’u kofɔli ye jeliw fɛ, olu minnu y’an ka laadalakow tɔbɔtɔbagaw ye. Sisan demisɛnninw tɛ caman lakodɔn nin mɔgɔba ninnu ka ko la an ka jamana kɔnɔ.

@fasokan bɛ ka ja dɔw tariku fɔ lakɔlidenw ye

Ɛntɛrinɛti yaalata lakɔlisow kɔnɔ, bulɔgu bilali duguw kɔnɔ, sigidaw kunnafonidili Ɛntɛrinɛti kan, olu ye walew ye, minnu bɛ jamana yɛrɛ, a n’a seko n’a dɔnko dɔnni nɔgɔya jamana demisɛnw bolo. O de la, dugu 8 lakɔlidenw sera ka caman dɔn Wa kamisɔkɔ ka tariku kan, min sɛbɛnnen bɛ Wikipeja kan nin cogo in na : « Wa Kamisɔkɔ bɔra jeli kabilaba la, min tun ɲɛsinnen bɛ Kirina kɛlɛ ni Mali masabonda sigili ɲɛfɔli n’a matarafali ma. A ye dɔnnin ni faamuyali caman sɔrɔ Manden laadalakow n’a seko ni dɔnkow kan. » Wa Kamisɔkɔ ye laadalakow dɔnba jɔnjɔn ye, a lakodɔnnen bɛ kosɛbɛ an ka maakɔrɔbaw fɛ, nka, sisan demisɛnw tɛ fɛn dɔn a ka ko la. «Nin ye anw senɲɛ fɔlɔ ye k’a lakodɔn, k’a ka tariku lamɛn », lakɔlidenw y’o fɔ an ka yaala sen fɛ.

Ɛntɛrinɛti kɛra sababu ye, nin lakɔliden ninnu sera ka Wa Kamisɔkɔ kaburu ja ye, ka tila k’a ka tariku lamɛn a yɛrɛ denkɛ Lasana fɛ, min y’a fa ka koba kɛlenw ɲɛfɔ u ye.

« Nin Ɛntɛrinɛti kalan in an ka lakɔliw la, o kɛra sababu ɲuman ye anw ka lakɔlidenw ma u ka se k’u ka jamana dɔn ka sɔrɔ u ma bɔ u nɔ na. U bɔra sisan ka ja dɔw ye i n’a fɔ Madinɛ Fɔri Kayi (Mali seko ni dɔnko tɔbɔtɔbɔli baarada ɲɛmɔgɔso bulɔgu kan). U tun tɛ na o ye sisan k’a sababu kɛ u n’o cɛ ka jan kosɛbɛ », o kɛra lakɔlikaramɔgɔ dɔ ka faamuya ye Ɛntɛrinɛti kalan laban na.

UNESCO Porozɛ Niger-Loire ka seko ni dɔnko tɔbɔtɔli baaraw taali ɲɛ nin sira in kan, o ye dɛmɛba ye bawo a na kɛ sababu ye an ka seko ni dɔnko cɛba minnu bɛ an ka togodaw la, olu ka lakodɔn demisɛnw fɛ,  ni Ɛntɛrinɛtiko tara ba la an ka duguw kɔnɔ.

Publicités

CréAlama bɛ bɔgɔlan kɛ walasa ka Mali seko ni dɔnkɔ ni kokɔrɔw lakodɔn


Bɔgɔlan ye ɲɛgɛn kɛli ye finimugu kan Mali la. Ɲɛ ninnu bɛ labɛn ni jiriw ni bɔgɔ ɲagaminnen ye. Ɲɛgɛn minnu bɛ kɛ finimugu kan, olu bɛ bɔ miiriyaw la ani Mali laada kɔrɔ : ciwara, Kanaga (n’o ye tamasiyɛ ye dugukolo ni kabakolo cɛ), ani kadɔw taabolo.

Bakari Alama Jakite bɛ cɛfiniw, musofiniw, demisɛenfiniw, ani tabulow dilan bɔgɔlan na ani fɛn caman wɛrɛw. A bɛ se ka ja caman sɔrɔ yan o lu kan. Kalanw ni jiraliw senfɛ, Alama b’o kɔrɔlenko ninnu jira diɲɛ fan bɛɛ fɛ walasa mali seko n’a dɔnko ka lakodɔn, Maliden ka se ka jira n’u dɔnko n’u taabolow ye.

Alama Bɛ bɛ jiriw bɔ, ka ɲɛw labɛn, ka ɲɛgɛnw kɛ ani ka finiw kala. Alama ni mɔgɔ wɛrɛw bɛ baara kɛ : a dɔgɔninw, kalalikɛlaw ani gesedalaw. A se ko donnen bɛ nin baara in na walasa bɔgɔlan ka don bala ani a ka lakodɔn doɲɛ fan bɛɛ fɛ.
Sisan, Alaa bɛ ka Faransitaa dɔ labɛn min kama a bɛ ka fɛn caman dilan bɔgɔlan na a bɛ na minnu majira k’u feere Utikalo la Faransi.