So nɛɛmalen togoda la

Sigi man nɔgɔn togodaw la funteni fɛ. Funteniba bɛ kɛ sokɔnɔ o waati, wa kɛnɛmadali ye farati ye. O de la, mɔgɔ caman ni fifalan bɛ kɛ.

Sékɔrɔka dɔ, n’o bɛ Segu kɛrɛfɛ, o ye fɛrɛ dɔ ɲini o funtenuko la a ka so kɔnɔ. A ye tiyojan dɔw labɛn, k’olu sɔri a ka so kɛrɛ naani bɛɛ fɛ. fiɲɛ bɛ don o tiyo ninnu fɛ ka taa sokɔnɔna lasumaya. A bɛ tiyo ninnu kun jigin dɔɔnin walasa tile yelen kana don sokɔnɔ. O b’a to a ni fifalan tɛ su ban ɲɔgɔn fɛ.

Nin hakilina in sɔrɔli dama ye koɲuman ye, ali n’a y’a sɔrɔ mɔgɔ si m’a ladege dugu kɔnɔ fɔlɔ. Ka hakilinaw ɲini gɛlɛya dɔw la dugula mɔgɔw yɛrɛfɛ,  o dama ye koɲuman ye. Dɔɔnin dɔɔnin, an bɛ ko dila.

 

Publicités

Togodala mɔgɔw bɛna sigi min san 20 ɲinan kɔ?

Dugukolo tun bɛ di mɔgɔ ma togodaw la dugutigi n’a ka kankɔrɔsigiw fɛ. O laada tun yedondon kelen ni woro ye. O bɛɛ tun bɛ kɛ ni faamuya ni bɛn ye.

Bi, n kɛlen ka dancɛjiralanw turu ye ka taa fan bɛɛ kungo kɔnɔ Bamakɔ ni Segu cɛ, n ye yɛrɛ ɲininka walasa k’a dɔn togodala mɔgɔw bɛ na sigiyɔrɔ sɔrɔ yɔrɔ min na san nataw kɔnɔ. Togodalasigi tɛ taa dugukolotigiya kɔ walasa ka sɛnɛ kɛ ani ka baganw mara. Bi bi in na, ɲininkali ka kan ka kɛ n’a y’a sɔrɔ togodalamɔgɔ dɔw bɛ na sɛnɛkɛyɔrɔ sɔrɔ san fila nata in na. I n’a fɔ jaw b’a jir’aw la cogo min na, soninw jɔli ani dancɛjiralanw turuli kungo kɔnɔ fan bɛɛ, o ye tamasiyɛnw ye walasa k’a jira k’o yɔrɔw bɛɛ feerela waritigi dɔ ma. Sɛnɛkɛyɔrɔw bɛɛ bɛ ka feere.

O dugukolofeereko in na togodaw la, dabaliw ka kan ka tigɛ walasa don nataw la, kɔngɔ kana na duguw daw kɔnkɔ k’a sababu kɛ sɛnɛkɛyɔrɔ ntanya ye.

Sɛnɛkɛla bɛ se ka balo a ka foro sɔrɔ la sɛnɛ fira fɛ, nk’a tɛ se abada k’a ka du balo n’a ka foro feerelen wari ye.

Duguba kɔnɔ, togodalademisɛnw tɛ baarawoloma kɛ

Ni ɲɛtigɛw banna, togodalademisɛnw bɛ taa u senna taama, ka fɛn ɲini walasa ka sɔmiɲɛ latigɛ ka ɲɛ musakako la du kɔnɔ. O waati la dugubaw kɔnɔ, demisɛnw tɛ baara bɔ baara la, u bɛ baara bɛɛ kɛ, walasa u ka wari sɔrɔ u wɔsi la ani danbe kɔnɔ.

O de kama, kamalennin ninnu dɔw bɛ taa u sigi Bamakɔ dɔgɔfiyɛbada la ka mɔbiliw kɔnɔ, mɔbili minnu bɛ na ni duguba ni togodalamuso jagokɛlaw ka minɛnw ye, n’olu bɛ na nafɛnw ni fɛn wɛrɛw feere sugu la.

Mɔbiliw se waati ye lajɛlifɛnba ye o la ye kamalennin ninnu cɛ. U bɛ boli ka mɔbili kunbɛn walasa ka minɛn dɔw sɔrɔ k’olu jigin k’o sara minɛ k’o bila u jufa la. Lajɛlifɛn sɛbɛkoma don k’a sababu kɛ, u kelenna bɛɛ, k’u miiri dalen to min b’u kɔ so kan, bɛɛ bɛ fɛ ka wari caman sɔrɔ ka taa so danbe kɔnɔ. Yanni mɔbili ka jɔ, bɛɛ b’i dulonyɔrɔ ɲini mɔbili la, ka bɔrɔ dɔ, tasa dɔ walima segin falen dɔ sɔrɔ k’o jigin, n’o tigi b’u sara minɛn selen kɔ a seyɔrɔ la.
Nin baara in bɛ jagokɛlamuso ninnu dɛmɛ kosɛbɛ bawo n’o tɛ, a ka gɛlɛn dɔw ka se ka taa n’u ka minɛnw ye u sigiyɔrɔ la.

K’i farikolo di dugu ka hɛrɛ sɔrɔli kama

Kunnafonidiminɛn ntanya kama, togodaw tigɛlen bɛ ka bɔ diɲɛ mɔgɔ tɔw la waati bɛɛ ka sɔrɔ an ka kɔrɔlenkow ni laadalakow caman bɛ kɛ an duguw kɔnɔ minnu ka kan ka dɔn diɲɛ fan bɛɛ.

Bi, villageinfos, n’o ye kunnafonidiyɔrɔ ye Mondoblog kan, a nana n’an ye o kɛnɛ dɔ kan Sayi, Massina mara la, n’o ni Bamakɔ cɛ ye kilomɛtɛrɛ 300 ni kɔ ye, Segu.

San o san, ɲɛnajɛ dɔ bɛ kɛ yen ka ɲɛsin laadalakow ni kokɔrɔw matarafali ma baw ni ɲɔgɔn cɛ dugu la, n’o ye komini minnu bɛ Bani ni Nizɛri ba cɛ, o duguw ye, Massina mara la, Mali la.

Ɲinanta ɲɛnajɛw, n’olu kɛra ka bɔ Awirilikalo tile 24 na ka se a tile 26 ma san 2011, o kɛra laadalako ni kokɔrɔ caman yeli sababu ye dunanw fɛ i n’a fɔ farikolo lasakali faso ye.

Farikolo lasarakali faso ye, o ye wale ye min bɛ kɛ laadaladɔnw sen fɛ Sayi, mɔgɔw fɛ, a ka di minnu yɛrɛ ye ka don a ko la ka sɔrɔ u ma diyagoya. Dugu mɔgɔ dɔw b’u yɛrɛ di, u bɛ bugɔ ni busa ye u kɔ la walima u disi la, k’a bɛɛ tigɛ tigɛ, k’a joli bɔ. A ka kan ka a ka jira yan ko diyagoya tɛ, mɔgɔ si tɛ sama a boloma ka na, u bɛɛ bɛ na u yɛrɛ ma, k’u farikolo di dugu ka hɛrɛ ni lafiya sɔrɔli kama. U bɛ gosi mɔgɔ wɛrɛw fɛ ni busa ye. A laban na, u bɛɛ fari tigɛ tigɛlen don, wa joli bɛ bɔ fan bɛɛ. Laadala delili don walasa ka hɛrɛ, bɛn ani lafiya don dugu kɔnɔ. Jaw b’a tɔ ɲɛfɔ.