Farafinna, nsiiri ye ɲɛnajɛ fɛn ye, nka a bɛ kɛ fana ka hakilina ɲuman di demisɛnw ma, k’u labɛn ka taabolo dɔw kɔnɔ, u bɛ se ka minnu sɔrɔ u ka diɲɛlatigɛ senfɛ. Nin nsiirin in bɛ kɛ ka mɔgɔw bilasira, minnu ka taabolo ye ka kow « bila kɔfɛ la waati bɛɛ », bawo o de la tɔri ma ku sɔrɔ.
Ku tun tɛ kungo sogow si la. U sɛgɛnnen fɛnɲɛnɛmanninw ka kinni fɛ, kungo sogow bɛɛ bɛnna a kan ɲɔgɔn ye dɔ senfɛ, k’u ka numukɛ dɔ wele o kana ku dila ka don u la.
Numukɛ nana jatigila minɛ tɔri ka so, u ye ci bila kungo sogow bɛɛ ma k’u ka na kudilayɔrɔ la o dugujɛ. Dugujɛlen, numukɛ ko tɔri ka gɛrɛ a ku ka dila. Tɔri ko ka ale ta to kɔfɛ la, ko numukɛ ka sogo tɔw ta dila fɔlɔ, ale ta tɛ kɔrɔtɔko ye bawo numukɛ jatigila ye ale yɛrɛ ka so ye. N’a tilala bɛɛ ta la, a bɛ ale ta dila.
Numukɛ ye kalo kelen kɛ, a bɛ ka ku don kungo sogow la sɔgɔma ani wula. Sɔgɔma o sɔgɔma, baara daminɛ tɔ, a b’a fɔ tɔri ka gɛrɛ a ku ka don, nka tɔri b’a fɔ ko kɔfɛ. Donlaban, kungo sogow bɛɛ ye ku sɔrɔ fɔ tɔri. O ta bilala o dugujɛ la. Su fɛ, tɔri ni numukɛ ye dumuni kɛ, ka baro kɛ kosɛbɛ. Dugu tilalen, u y’u da ko ni dugu jɛra, tɔri ku bɛ don. Dugu jɛlen, numukɛ wilila, nka a y’a sɔrɔ numukɛ sara. O la, tɔri tora kun ntanya la.
Kun min y’a to ku tɛ tɔri la, o filɛ nin ye. N’an bɛ fɛ ka ko min kɛ, an k’a kɛ a kɛ waati la bawo an t’a dɔn fɛn min bɛ ɲɛ.
FASOKAN 